ដោយៈ ម៉ាលីនណា
ភ្នំពេញៈ រោងចក្រធុនធំកំពុងដំណើរការនៅកម្ពុជា គិតត្រឹមចុងឆ្នាំ២០២៥ មានប្រមាណ៣ពាន់រោងចក្រ កើនឡើងជិត៣០% បើធៀបនឹងឆ្នាំ២០២៤ ខណៈរោងចក្រធុនធំ ដែលបានបិទទ្វារក្នុងឆ្នាំ២០២៥មានចំនួនជាង៤០រោងចក្រ។ នេះបើយោងតាមក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។
របាយការណ៍ក្រសួងឧស្សាហកម្ម បង្ហាញថា គិតត្រឹមដំណាច់ឆ្នាំ២០២៥ នៅកម្ពុជាមានរោងចក្រធុនធំដំណើរការចំនួន៣០៤៣ រោងចក្រ កើនឡើង៦៥៨រោងចក្រ ឬស្មើនឹង២៧,១៣% បើធៀបនឹងឆ្នាំ២០២៤។ ជាមួយគ្នានេះក៏មានរោងចក្រធុនធំបិទទ្វារចំនួន៤៣ផងដែរ ខណៈក្នុងឆ្នាំ២០២៤ មានរោងចក្រ២៦បិទទ្វារ។
ក្នុងចំណោមរោងចក្រទាំង៣០៨៣ គឺចំនួន៨៩៥ ស្ថិតក្នុងរាជធានីភ្នំពេញ។ ចំនួន៦០៣ នៅខេត្តកំពង់ស្ពឺ ចំនួន៤០៣នៅខេត្តកណ្តាល ចំនួន៣២៧ នៅខេត្តស្វាយរៀង ចំនួន៣០៥ នៅខេត្តព្រះសីហនុ, និង២៣១ នៅខេត្តតាកែវ ជាដើម។
ភាគច្រើននៃរោងចក្រទាំងនោះ គឺជារោងចក្រកាត់ដេរសម្លៀកបំពាក់, កែច្នៃផលិតផលពីស្បែក ក្រដាស និងផលិតផលពីក្រដាស ផលិតផលម្ហូបអាហារ បរិក្ខាអគ្គិសនី ផលិតផលកៅស៊ូ និងផ្លាស្ទិក គ្រឿងសង្ហារិម ផលិតផលពីរ៉ែអលោហៈ និងផលិតផលពីឈើ។
ជាមួយគ្នានេះចំនួនកម្លាំងពលកម្ម ដែលកំពុងបម្រើការតាមបណ្តារោងចក្រ ក្នុងឆ្នាំ២០២៥ គឺប្រមាណ១,២៧លាននាក់ កើនឡើង ៩,៣៨% បើធៀបនឹងឆ្នាំ២០២៤។ នេះបើតាមក្រសួងឧស្សាហកម្ម។
ក្រសួងបានលើកឡើងថា ចាប់តាំងពីដើមនីតិកាលទី៧ រាជរដ្ឋាភិបាលកម្ពុជាបានខិតខំយ៉ាងខ្លាំង ក្នុងការកែទម្រង់ជាបន្តបន្ទាប់ ដែលជាមូលដ្ឋានគ្រឹះដ៏សំខាន់ សម្រាប់ការអភិវឌ្ឍសង្គម- សេដ្ឋកិច្ចប្រកបដោយចីរភាព។រាជរដ្ឋាភិបាលនៅតែបន្តខិតខំពង្រឹង ភាពប្រកួតប្រជែង ភាពរឹងមាំ និងភាពធន់ទៅនឹងវិបត្តិ តាមរយៈការកែលម្អបរិយាកាសធុរកិច្ច, ការបន្តធ្វើពិពិធកម្មសេដ្ឋកិច្ច ការពង្រឹងលទ្ធភាពលើកកម្ពស់ខ្សែច្រវាក់ផលិតកម្មក្នុងស្រុក សំដៅជំរុញការតភ្ជាប់ទៅនឹងខ្សែច្រវាក់ផលិតកម្មក្នុងតំបន់ និងសកល ការចាប់យកសកម្មភាពផលិតកម្មដែលបង្កើនតម្លៃបន្ថែមកាន់តែខ្ពស់ ការបង្កើតការងារបន្ថែមកាន់តែច្រើនសម្រាប់ពលកម្មមានជំនាញ និងការពង្រីកមូលដ្ឋានសេដ្ឋកិច្ចជាតិឱ្យកាន់តែទូលំទូលាយ។ល។
ក្រសួងបញ្ជាក់ថា វិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ត្រូវបានរាជរដ្ឋាភិបាលកម្ពុជា ចាត់ជាឧបករណ៍យុទ្ធសាស្ត្រចាំបាច់មួយ ក្នុងការឈានទៅសម្រេចនូវចក្ខុវិស័យនានា ដូចបានកំណត់ក្នុងយុទ្ធសាស្ត្របញ្ចកោណ ដំណាក់កាលទី១ និងជាកម្លាំងចលករមួយជំរុញកំណើនសេដ្ឋកិច្ច និងអភិវឌ្ឍសង្គមកម្ពុជា។ ជាក់ស្តែងក្នុងឆ្នាំ២០២៥ វិស័យឧស្សាហកម្មបានបន្តនិន្នាការកើនឡើង ក្នុងរង្វង់ ៩,៣% ដោយឡែកក្នុងឆ្នាំ២០២៦ នេះទោះបីត្រូវប្រឈមនឹងបញ្ហាជាច្រើន រួមទាំងអរិភាពព្រំដែនជាមួយប្រទេសជិតខាងក្តី ក៏វិស័យនេះត្រូវបានព្យាករណ៍មានកំណើន ៧,២% ផងដែរ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៥ ខែកុម្ភៈថា ការកែទម្រង់ប្រព័ន្ធច្បាប់វិនិយោគ កំណើនផលិតភាពនៃកម្លាំងពលកម្មក្នុងស្រុក និងមានទីផ្សារនាំចេញធំទូលាយ បានជួយឱ្យកម្ពុជាទាក់ទាញវិនិយោគិនជាតិ និងអន្តរជាតិកាន់តែច្រើនឱ្យបើករោងចក្រផលិតផ្ទាល់។
លោកបន្តថា កំណើនរោងចក្រ ជាពិសេសរោងចក្រធុនធំ គឺពិតសារៈសំខាន់ណាស់សម្រាប់កម្ពុជានាពេលនេះ។ មួយវិញទៀតបើគេសង្កេតមើលជាទូទៅ គឺរោងចក្រនៅកម្ពុជានាពេលបច្ចុប្បន្នមិនមែនសុទ្ធតែជាប្រភេទឧស្សាហកម្ម ធុនស្រាលដូចកាលពីមុនឡើយ។
លោកបានថ្លែងថា ការកែលម្អច្បាប់វិនិយោគឱ្យទាក់ទាញ សម្បូរពលកម្ម មានទីផ្សារបរទេសចាំបញ្ជាទិញ និងការចូលជាធរមាននៃកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគីដែលកម្ពុជាបានចុះជាមួយប្រទេសនានា គឺជាចំណែកសំខាន់ដែលជួយជំរុញកំណើនការនាំចេញទំនិញ និងសេដ្ឋកិច្ចកម្ពុជាកាន់តែរីកចម្រើន៕
