ដោយៈ ម៉ាណា
ភ្នំពេញៈ ឯកអគ្គរាជទូតកម្ពុជា ប្រចាំប្រទេសកូរ៉េខាងត្បូងលោក ឃួន ផុនរតនៈ ស្វាគមន៍ការយកអ្នកសារព័ត៌មានកូរ៉េមកកម្ពុជា ដើម្បីយកព័ត៌មានពិតក្រោយកម្ពុជា បានបង្ក្រាបឧក្រិដ្ឋកម្មអនឡាញចេញពីប្រទេស។
លោកបានឲ្យដឹងថា ការផ្សាយរបស់ប្រព័ន្ធផ្សព្វផ្សាយកូរ៉េ នឹងផ្ដល់ទំនុកចិត្តដល់វិនិយោគិន និងភ្ញៀវទេសចរណ៍កូរ៉េលើប្រទេសកម្ពុជា។
ក្នុងជំនួបជាមួយប្រធានក្រុមប្រឹក្សាភិបាលក្រុមហ៊ុន Daejoo KC នៅស្ថានទូតកម្ពុជានាទីក្រុងសេអ៊ូល ព្រឹកថ្ងៃទី៩ ខែកុម្ភៈ ឆ្នាំ២០២៦ ដែលបានបង្ហោះលើហ្វេសបុកផេក ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ លោក ឃួន ផុនរតនៈ បានលើកឡើងពីបំណងរបស់រដ្ឋាភិបាលកម្ពុជា ក្នុងការស្ដារទំនាក់ទំនងជាមួយកូរ៉េខាងត្បូងទៅរកភាពប្រក្រតីវិញ បន្ទាប់ពីមានបញ្ហាឧក្រិដ្ឋកម្មអនឡាញបានកើតឡើងកន្លងមក។
លោកបានបញ្ជាក់ថា “កម្ពុជាស្វាគមន៍ ការចុះមកផ្សាយអំពីការពិតនៅកម្ពុជា ពីការបង្ក្រាបបទល្មើសអនឡាញ ទៅកាន់វិនិយោគិន និងភ្ញៀវទេសចរកូរ៉េ”។
ប្រធានក្រុមប្រឹក្សាភិបាលក្រុមហ៊ុន Daejoo KC លោក Park Joo Bong បានលើកឡើងថាកូរ៉េ នៅតែផ្ដល់សារៈសំខាន់ដល់ទំនាក់ទំនងជាមួយកម្ពុជា។
លោកបន្ថែមថា នៅពាក់កណ្ដាលខែកុម្ភៈនេះ លោកនឹងដឹកនាំអ្នកវិនិយោគ និងអ្នកកាសែតកូរ៉េមកកម្ពុជាផងដែរ ដើម្បីបង្ហាញពីបរិយាកាសវិនិយោគ និងឱ្យអ្នកយកព័ត៌មាន បានរាយការណ៍ពីតថភាពក្នុងប្រទេសកម្ពុជាដល់ប្រជាជនកូរ៉េផងដែរ។
លោក ឃួន ផុនរតនៈ បានបញ្ជាក់ទៅភាគីកូរ៉េថា ស្ថានទូតនឹងជួយសហការរៀបចំ ជំនួបរវាងប្រតិភូលោកPark ជាមួយក្រសួងស្ថាប័នពាក់ព័ន្ធកម្ពុជាលើករណីនេះផងដែរ។
បន្ទាប់ពីមានករណីនិស្សិតកូរ៉េម្នាក់ បានស្លាប់នៅភ្នំបូកគោ ខេត្តកំពត កាលពីខែតុលា ឆ្នាំ២០២៥ ពាក់ព័ន្ធនឹងឧក្រិដកម្មឆបោកអនឡាញ សាធារណរដ្ឋកូរ៉េបានចាត់ថ្នាក់តំបន់មួយចំនួន ស្ថិតជាតំបន់ហាមប្រាមកម្រិតខ្ពស់ និងបញ្ជូនមន្ត្រីជាបន្ទាប់មកកម្ពុជា ដើម្បីដោះស្រាយបញ្ហាជនជាតិកូរ៉េ ជាប់ក្នុងឧក្រិដ្ឋកម្មឆបោកអនឡាញនៅកម្ពុជាផងដែរ រហូតឈានដល់ការបង្កើតក្រុមការងាររួមកម្ពុជា -កូរ៉េនៅខែវិច្ឆិកា ឆ្នាំ២០២៥ផងដែរ។
នៅថ្ងៃទី១៣ ខែមករា ឆ្នាំ២០២៦ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត បានប្រកាសលើបណ្ដាញសង្គមរបស់សម្ដេចថា “ការប្រយុទ្ធប្រឆាំងនឹងឧក្រិដ្ឋកម្ម ឆបោកតាមប្រព័ន្ធបច្ចេកវិទ្យា គឺជាចំណុចដ៏សំខាន់នាពេលនេះ” ខណៈកម្ពុជាបានបង្ហាញការប្ដេជ្ញាចិត្តបោសសម្អាត បណ្ដាញឧក្រិដ្ឋកម្មតាមអនឡាញនៅកម្ពុជា ឱ្យអស់ត្រឹមខែមេសាខាងមុខ៕
