ដោយៈ ម៉ាលីនណា
ភ្នំពេញៈ ការដាក់ចេញ ឬកំណត់គោលនយោបាយបែងចែកភាគលាភរបស់ក្រុមហ៊ុនបោះផ្សាយមូលបត្រណាមួយ ពិតជាជះឥទ្ធិពលដល់ទំនុកចិត្តវិនិយោគិន និងតម្លៃភាគហ៊ុនផងដែរ។
ប៉ុន្តែការបែងចែកភាគលាបតិចឬច្រើន អាស្រ័យលើស្ថានភាពប្រាក់ចំណេញរបស់ក្រុមហ៊ុនផងដែរ វាមិនកំណត់លើវិនិយោគិននោះទេ។
ប្រសិនបើក្រុមហ៊ុនបោះផ្សាយ មានគោលនយោបាយបែងចែក ភាគលាភខ្ពស់ និងទៀងទាត់នឹងទាក់ទាញវិនិយោគិន ព្រោះពួកគេនឹងទទួលបានប្រាក់ចំណេញពីភាគហ៊ុន ដែលពួកគេកំពុងកាន់កាប់ ដែលធ្វើឱ្យពួកគេកាន់តែមានសុទិដ្ឋិនិយម និងមានទំនុកចិត្តទៅលើក្រុមហ៊ុនបោះផ្សាយ ដែលជាហេតុនាំឱ្យតម្លៃភាគហ៊ុនប្រែប្រួលជាវិជ្ជមាន។
ផ្ទុយទៅវិញ ប្រសិនបើក្រុមហ៊ុនបោះផ្សាយ ផ្លាស់ប្តូរគោលនយោបាយ ដោយមិនបែងចែកភាគលាភ ហើយរក្សាទុកប្រាក់ចំណេញទាំងអស់ជាដើមទុនវិនិយោគ សម្រាប់ពង្រីកអាជីវកម្ម វិនិយោគិនមួយចំនួនអាចជ្រើសរើសលក់ភាគហ៊ុនចេញ ដើម្បីទៅវិនិយោគក្នុងក្រុមហ៊ុនផ្សេង ដែលផ្តល់ភាគលាភទៀងទាត់ជាងនេះ ដែលអាចបណ្តាលឱ្យថ្លៃភាគហ៊ុនរបស់ក្រុមហ៊ុននោះធ្លាក់ចុះក្នុងទីផ្សារ។
ក្នុងករណីក្រុមហ៊ុនបោះផ្សាយ មិនបែងចែកភាគលាភ វិនិយោគិនគួរពិនិត្យមើលផែនការរបស់ក្រុមហ៊ុន ថាតើវាមានសក្តានុពលនៃការបង្កើនប្រាក់ចំណេញក្នុងកម្រិតណា មុននឹងសម្រេចចិត្តថាត្រូវលក់ ឬទិញភាគហ៊ុនរបស់ក្រុមហ៊ុននោះបន្ថែម ក្នុងអំឡុងពេលដែលភាគហ៊ុនរបស់ក្រុមហ៊ុនកំពុងធ្លាក់ថ្លៃ៕
