ដោយៈ ម៉ាណា
ភ្នំពេញៈ តម្លៃផ្សារហ៊ុនមានការប្រែប្រួល ឡើងឬចុះ អាស្រ័យលើកត្តាជាច្រើន ក្នុងនោះកត្តាខាងក្រៅជះឥទ្ធិពល ដល់តម្លៃផ្សារហ៊ុនផងដែរ។
យោងតាមឯកសាររបស់ផ្សារហ៊ុនកម្ពុជាបានឲ្យដឹងថា អត្រាការប្រាក់ និងថ្លៃភាគហ៊ុន គឺមានទំនាក់ទំនងគ្នាយ៉ាងជិតស្និទ្ធ។ នៅពេលដែលអត្រាការប្រាក់កើនឡើង អាចធ្វើឱ្យថ្លៃភាគហ៊ុនធ្លាក់ចុះ ឬផ្ទុយមកវិញ នៅពេលដែលអត្រាការប្រាក់ធ្លាក់ចុះ ក្រុមហ៊ុនអាចស្វែងរកកម្ចីក្នុងទំហំទឹកប្រាក់ច្រើន ជាមួយអត្រាការប្រាក់ទាប ដែលនាំឱ្យប្រាក់ចំណេញរបស់ពួកគេកើនឡើង។
ម្យ៉ាងវិញទៀត ប្រសិនបើអត្រាការប្រាក់កើនឡើងកាន់តែខ្ពស់ នោះនាំឱ្យវិនិយោគិន ទទួលបានប្រាក់ចំណេញកាន់តែតិច និងតម្លៃភាគហ៊ុនមានការធ្លាក់ចុះ។
លើសពីនេះកត្តាសេដ្ឋកិច្ច និងនយោបាយ ភាពមិនប្រាកដប្រជានៃសេដ្ឋកិច្ច និងអស្ថិរភាពនយោបាយ គឺជាប្រភពហានិភ័យមួយ ដែលបណ្តាលឱ្យកើតមាន ការធ្លាក់ចុះនៃសម្ទុះទីផ្សារ និងប៉ះពាល់តម្លៃជួញដូរភាគហ៊ុនប្រចាំថ្ងៃ។
គិតត្រឹមត្រីមាសទី១ ឆ្នាំ២០២៥ តម្លៃជួញដូរភាគហ៊ុនប្រចាំថ្ងៃនៅលើផ្សារមូលបត្រកម្ពុជា បានធ្លាក់ចុះមកត្រឹមប្រមាណ១៣ម៉ឺនដុល្លារអាម៉េរិកក្នុងមួយថ្ងៃ ដោយសារកត្តាមិនប្រាកដប្រជា ចំពោះស្ថានភាពសេដ្ឋកិច្ចពិភពលោក។
កត្តាគ្រោះធម្មជាតិ៖ មានដូចជាគ្រោះមហន្តរាយ និងជំងឺរាតត្បាតជាសកល ជាក់ស្ដែង ជំងឺកូវីដ-១៩ បានធ្វើឱ្យប៉ះពាល់ដល់តម្លៃភាគហ៊ុនជាសាកល។ ដោយឡែកស្ថានភាពផ្សារមូលបត្រកម្ពុជា (ផមក) គឺមានចលនាផ្ទុយ ដោយសារការវិនិយោគនៅ ផមក អាចចាប់ផ្តើមពីដើមទុនតិច និងងាយស្រួលបម្លែងជាសាច់ប្រាក់ ជាងការវិនិយោគលើវិស័យផ្សេងៗទៀត ព្រមទាំងមានការគ្រប់គ្រងនូវការឡើង-ចុះថ្លៃភាគហ៊ុនត្រឹម +/–១០ ភាគរយ។
