ដោយៈ ចំណាន
ភ្នំពេញៈ ទំនោរទីផ្សារ ឬកត្តាចិត្តសាស្ត្ររបស់វិនិយោគិន គឺជាការឆ្លុះបញ្ចាំងនូវអារម្មណ៍ ឬទស្សនៈរបស់វិនិយោគិន ចំពោះស្ថានភាពនៅលើទីផ្សារ។
វិនិយោគិនធ្វើការសម្រេចចិត្តវិនិយោគ ដោយផ្អែកលើអារម្មណ៍ផ្ទាល់ខ្លួន ឬតាមគេ តាមឯង ច្រើនជាងធ្វើការវិភាគបែបមូលដ្ឋាន និងការវិភាគបែបបច្ចេកទេស។
កត្តាទំនោរទីផ្សារនេះ ពិបាកវាស់វែង និងគ្រប់គ្រង ដោយសារតែគ្មានមូលដ្ឋានច្បាស់លាស់ក្នុងការវិភាគ ប៉ុន្តែវាអាចជះឥទ្ធិពលគួរឱ្យកត់សម្គាល់មកលើបម្រែបម្រួលថ្លៃភាគហ៊ុន ក្នុងទីផ្សារក្នុងរយៈពេលខ្លី ដូច្នេះសូម្បីតែក្រុមហ៊ុនបោះផ្សាយ ដែលមានសុខភាពហិរញ្ញវត្ថុល្អ ក៏ថ្លៃភាគហ៊ុនរបស់ពួកគេអាចនឹងធ្លាក់ចុះ ដោយសារទំនោរទីផ្សារមិនល្អ។
ឧទាហរណ៍ នៅពេលដែលមានក្រុមហ៊ុនបោះផ្សាយថ្មី ទើបតែចុះបញ្ជីនៅលើទីផ្សារ វិនិយោគិនមួយចំនួនអាចលក់ភាគហ៊ុន ដែលមានស្រាប់ ដើម្បីបង្វែរទុនទៅទិញភាគហ៊ុនថ្មី។ ជាលទ្ធផល តម្លៃភាគហ៊ុនថ្មីនឹងមាននិន្នាការកើនឡើង ដោយសារការកើនឡើងនៃតម្រូវការ ខណៈពេលដែលភាគហ៊ុន ដែលមានស្រាប់ត្រូវបានគេលក់ចេញច្រើន។
ការប្រែប្រួលនៃថ្លៃភាគហ៊ុន ជាពិសេសថ្លៃភាគហ៊ុនធ្លាក់ចុះ មិនសុទ្ធតែបញ្ជាក់ពីស្ថានភាពរបស់ក្រុមហ៊ុន បោះផ្សាយមានបញ្ហានោះទេ ដូច្នេះសម្រាប់អ្នកដែលមានសាច់ប្រាក់នៅទំនេរ គួរតែពិចារណាកត្តាទាំងនេះឱ្យម៉ត់ចត់ មុនធ្វើការសម្រេចចិត្តវិនិយោគ ដោយផ្អែកលើមូលដ្ឋាននៃអាជីវកម្មដែលមានស្ថិរភាព និងសក្តានុពលលូតលាស់របស់ក្រុមហ៊ុនបោះផ្សាយ ដើម្បីបង្កើនឱកាសទទួលបានផលចំណេញ និងកាត់បន្ថយហានិភ័យ៕
