ដោយៈ ម៉ាលីនណា
ភ្នំពេញៈ មន្រ្តីជាន់ខ្ពស់នគរបាលជាតិ សភាពាណិជ្ជកម្ម និងសមាគមនានា បានរួមគ្នាបង្កើតក្រុមការងារចម្រុះ ក្នុងការប្រយុទ្ធប្រឆាំងបទល្មើសឆបោកតាមប្រព័ន្ធធនាគារ។
ការសម្រេចនេះធ្វើឡើងក្នុងកិច្ចប្រជុំស្តីពី “យន្តការ និងដំណើរការរួមគ្នាក្នុងកិច្ចប្រតិបត្តិការ រវាងមន្ត្រីអនុវត្តច្បាប់វិស័យរដ្ឋ និងវិស័យឯកជន ក្នុងវិស័យធនាគារ និងមីក្រូហិរញ្ញវត្ថុនៅកម្ពុជា” ក្រោមយន្តការ ក្រុមការងារ “ង” “ផ្នែកសេវាធនាគារ និងហិរញ្ញវត្ថុ” នៃវេទិការាជរដ្ឋាភិបាល-ផ្នែកឯកជន។
កិច្ចប្រជុំនេះធ្វើឡើង ក្រោមការសហដឹកនាំ ដោយឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងលោកនាយឧត្តមសេនីយ៍ ស ថេត អគ្គស្នងការនគរបាលជាតិ និងឧកញ៉ា លឹម សុជាតិ អនុប្រធានសភាពាណិជ្ជកម្មកម្ពុជា និងជាអនុសហប្រធានទី១ ក្រុមការងារ “ង” តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាសហប្រធានក្រុមការងារ “ង” តំណាងផ្នែកឯកជន។
កិច្ចប្រជុំនេះ ក៏មានការចូលរួមផងដែរពីសំណាក់ លោកជំទាវឧកញ៉ានួន ពេជ្រសុផល អគ្គនាយកស្តីទីសភាពាណិជ្ជកម្មកម្ពុជា និងមន្ត្រីពាក់ព័ន្ធជំនាញ នៃអគ្គស្នងការនគរបាលជាតិ តំណាងសមាគមធនាគារនៅកម្ពុជា តំណាងសមាគមគ្រឹះស្ថានមីក្រូហិរញ្ញវត្ថុ នៅកម្ពុជា តំណាងធនាគារ គ្រឹះស្ថានមីក្រូងហរិញ្ញវត្ថុឯកជន និងសមាជិក សមាជិកនៃក្រុមការងារ “ង” ជាច្រើនទៀតផងដែរ។
កិច្ចប្រជុំនេះមានគោលបំណង ដើម្បីពង្រឹងកិច្ចសហប្រតិបត្តិការរវាងមន្ត្រីអនុវត្តច្បាប់វិស័យរដ្ឋ និងវិស័យឯកជន ក្នុងវិស័យធនាគារ និងមីក្រូហិរញ្ញវត្ថុនៅកម្ពុជា លើចំណុចស្នូលដូចជា ទី១ ទប់ស្កាត់បទល្មើសឆបោកតាមប្រព័ន្ធធនាគារ ដែលកំពុងតែកើតមានឡើង ក្នុងប្រទេសកម្ពុជា។
ទី២ ទទួលធាតុចូលពីផ្នែកឯកជនពាក់ព័ន្ធនឹងបញ្ហា សំណើ ដំណោះស្រាយ និងនីតិវិធីមួយចំនួនក្នុងន័យជួយបង្កើនការ ទប់ស្កាត់បទល្មើសឆបោកតាមប្រព័ន្ធធនាគារនៅកម្ពុជា។ ទី៣ បង្កើតក្រុមការងារចំរុះ ដែលមានការចូលរួមពីវិស័យឯកជន ក្នុងវិស័យធនាគារក្នុងការប្រយុទ្ធប្រឆាំងបទល្មើសឆបោកតាមប្រព័ន្ធធនាគារ និងទី៤ និងជាពិសេស ដើម្បីផ្តល់ធាតុចូល ដើម្បីពង្រឹង និងដោះស្រាយបញ្ហារួមគ្នារវាងវិស័យរដ្ឋ និងវិស័យឯកជន ក្នុងការចូលរួមទប់ស្កាត់បទល្មើសឆបោកតាមប្រព័ន្ធបច្ចេកវិទ្យា និងបទល្មើសបោសសម្អាតប្រាក់។
ជាលទ្ធផល កិច្ចប្រជុំបានឯកភាពសម្រេចបង្កើត ក្រុមការងារចំរុះ ដែលមានសមាសភាពចូលរួម ពីតំណាងធនាគារនីមួយៗ ក្រោមកិច្ចសម្របសម្រួលបច្ចេកទេស និងផ្លូវច្បាប់ផងដែរ ពីសំណាក់អគ្គស្នងការនគរបាលជាតិ ក្នុងការប្រយុទ្ធប្រឆាំងបទល្មើសឆបោក តាមប្រព័ន្ធធនាគារ៕
