ក្រុមការងារផ្នែកឯកជន ក្រុម “ណ” “ផ្នែកសេដ្ឋកិច្ច សង្គមឌីជីថល និងទូរគមនាគមន៍”លើកឡើងនូវបញ្ហាប្រឈម

ដោយៈ ចំណាន

    ភ្នំពេញៈ អគ្គនាយកដ្ឋានសភាពាណិជ្ជកម្មកម្ពុជា មានរៀបចំកិច្ចប្រជុំក្រុមការងារផ្នែកឯកជន ក្រុម “ណ” “ផ្នែកសេដ្ឋកិច្ច សង្គមឌីជីថល និងទូរគមនាគមន៍” នៃវេទិការាជរដ្ឋាភិបាល-ផ្នែកឯកជន។

កិច្ចប្រជុំនេះដឹកនាំដោយ ឧកញ៉ា សុខ ពិសិដ្ឋ អនុប្រធានសភាពាណិជ្ជកម្មកម្ពុជា និងជាអនុសហប្រធានទី១ ក្រុមការងារ “ណ” តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាសហប្រធានក្រុមការងារ “ណ” តំណាងផ្នែកឯកជន។ កិច្ចប្រជុំនេះក៏មានការចូលរួមផងដែរ ពីសំណាក់តំណាងសមាគមបច្ចេកវិទ្យាឌីជីថលកម្ពុជា តំណាងសមាគមសហព័ន្ធវិនិយោគិនកម្ពុជា និងតំណាងក្រុមហ៊ុន សហគ្រាសឯកជនពាក់ព័ន្ធក្នុងវិស័យឌីជីថល និងទូរគមនាគមន៍មួយចំនួនទៀតផងដែរ។

កិច្ចប្រជុំនេះមានគោលបំណង ដើម្បីបន្តធ្វើការពិនិត្យ ពិភាក្សាលើបញ្ហាប្រឈមដែលនៅសេសសល់ និងលើកឡើងនូវបញ្ហាប្រឈមថ្មីៗបន្ថែមទៀតក្នុងវិស័យសេដ្ឋកិច្ច សង្គមឌីជីថល និងទូរគមនាគមន៍ ដើម្បីដាក់ស្នើសុំដំណោះស្រាយជាមួយនឹងដៃគូ គឺក្រសួងប្រៃសណីយ៍ និងទូរគមនាគមន៍ នាពេលខាងមុខនេះ។

កិច្ចប្រជុំបានធ្វើការពិនិត្យ ពិភាក្សាលើបញ្ហាប្រឈមរបស់ផ្នែកឯកជនមួយចំនួនបន្ថែមថ្មីរួមមាន៖ ១.ការបកស្រាយផ្សេងគ្នាលើនីតិវិធីស្នើសុំជួសជុលបណ្តាញខ្សែអុបទិករបស់ ន.ទ.ក.។ ២. ការហាមមិនអនុញ្ញាតសាងសង់ ចំពោះទីតាំងហាមឃាត់ពាក់ព័ន្ធនឹងScamming ថែមទាំងតំបន់សេដ្ឋកិច្ចពិសេស (មិនស្មើភាព) ៣.ការហាមមិនឱ្យសាងសង់ហេដ្ឋារចនាសម្ព័ន្ធអុបទិក ដោយមិនអនុវត្តតាម ស.ជ.ណ ១៤១២ នៃទីស្តីការគណៈរដ្ឋមន្ត្រី។ ៤. វិធានការផាកពិន័យដែលចេញដោយ ន.ទ.ក. មានលក្ខណៈធ្ងន់ធ្ងរខ្លាំង រួមនឹងបញ្ហាប្រឈមមួយចំនួន​ផ្សេងទៀតផងដែរ៕