ដោយ: គង់ លាងហួរ
អន្តរជាតិ: យោងតាមកាសែត Vnexpress បានរាយការណ៍ថា ទីក្រុងហូជីមិញនៅប្រទេសវៀតណាមមិនទទួលបានការផ្គត់ផ្គង់គម្រោងអាផាតមុិន ដែលមានតម្លៃក្រោម៤០លានដុងក្នុងមួយម៉ែត្រការ៉េ (ប្រមាណ១.៥០០ដុល្លារ)គិតត្រឹមឆមាសទី១ ឆ្នាំនេះ។
ក្នុងរយៈពេល៦ខែដំបូងដើមឆ្នាំនេះ ទីក្រុងហូជីមិញ ដែលជាទីក្រុងធំបំផុតក្នុងប្រទេសវៀតណាមទទួលបានគម្រោងថ្មីចំនួន៤ ដែលមានអាផាតមុិនសរុបចំនួន៣.៣៥៣យូនីត ហើយអាផាតមុិនទាំងនោះមានតម្លៃថ្លៃទាំងអស់។ នេះបើយោងតាមសមាគមអចលនទ្រព្យទីក្រុងហូជីមិញ (HoREA)។
ក្រុមហ៊ុនប្រឹក្សាអចលនទ្រព្យ Avison Young Vietnam បានបញ្ជាក់នៅក្នុងរបាយការណ៍មួយថា តម្លៃអាផាតមុិនក្នុងទីផ្សារបឋម(Primary Market)បានកើនឡើងចន្លោះពី៤ភាគរយទៅ៦ភាគរយ ចំពោះករណីគម្រោងបើកដំណើរការថ្មី។ ទីផ្សារបឋម មានន័យថា អតិថិជនទិញយកអាផាតមុិនដោយផ្ទាល់ពីអ្នកអភិវឌ្ឍន៍។
គម្រោងបើកដំណើរការថ្មីនានានៅក្នុងត្រីមាសទី២ មានអាផាតមុិន ដែលមានតម្លៃ៥៥លានដុងក្នុងមួយម៉ែត្រការ៉េ ឬថ្លៃជាងនេះ។ យោងតាមរបាយការណ៍បានបង្ហាញថា អាផាតមិនថ្មីសរុបចំនួន៣៦.០០០យូនីត ត្រូវបានបើកដំណើរការលក់នៅទូទាំងប្រទេសវៀតណាមក្នុងឆមាសទីមួយ ឆ្នាំ២០២៥។
ចំនួនអាផាតមុិន ដែលបើកដំណើរការថ្មីបានកើនឡើងទ្វេរដងបើធៀបនឹងឆ្នាំមុន។ ក្នុងចំណោមនោះ ចំនួនជាង៦២ភាគរយនៃចំនួនអាផាតមុិនសរុប ត្រូវបានគេដាក់លក់ក្នុងតម្លៃលើសពី៨០លានដុងក្នុងមួយម៉ែត្រការ៉េ៕ប្រភព: Vnexpress៕
គិតត្រឹមឆមាសទី១ ឆ្នាំនេះ។){kind=link}