ដោយៈ ម៉ាលីនណា
ភ្នំពេញៈ ក្រុមហ៊ុនកូរ៉េធំមួយគ្រោងបោះទុនវិនិយោគ លើការកែច្នៃប្រេង និងឧស្ម័នពីសំបកគ្រាប់ស្វាយចន្ទីរ ដើម្បីនាំចេញនៅក្នុងខេត្តកំពង់ធំ។
ព័ត៌មាននេះ ត្រូវបានលើកឡើងក្នុងពេលលោកវ៉ា រុតសាន រដ្ឋលេខាធិការក្រសួងពាណិជ្ជកម្ម បានទទួលជួបពិភាក្សាការងារជាមួយសហព័ន្ធស្វាយចន្ទីកម្ពុជា និងគណៈប្រតិភូនៃទីភ្នាក់ងារថាមពលកូរ៉េ (The Korea Energy Agency)។
គណៈប្រតិភូនៃទីភ្នាក់ងារថាមពលកូរ៉េ (The Korea Energy Agency) ដឹកនាំដោយលោក Kyoungmin Kim ប្រធានក្រុមគាំទ្រគម្រោងក្រៅប្រទេស នៃនាយកដ្ឋានសហប្រតិបត្តិការអន្តរជាតិ។
កិច្ចជំនួបនេះ មានការអញ្ជើញចូលរួមពី លោកអ៊ុំ កុសល អនុរដ្ឋលេខាធិការក្រសួងពាណិជ្ជកម្ម និងក្រុមការងារនៃអគ្គនាយកដ្ឋានពាណិជ្ជកម្មក្នុងប្រទេស និងអគ្គនាយកដ្ឋានជំរុញពាណិជ្ជកម្ម និងមានការចូលរួមពីគណៈប្រតិភូ ក្រុមការងារសហព័ន្ធស្វាយចន្ទីកម្ពុជាជាច្រើនរូបផងដែរ។
កិច្ចជំនួបនេះ រៀបចំឡើងក្នុងគោលបំណងពិភាក្សា អំពីកិច្ចសហប្រតិបត្តិការ និងឱកាសវិនិយោគរបស់ក្រុមហ៊ុនកូរ៉េ លើការកែច្នៃប្រេង និងឧស្ម័ន ពីសំបកគ្រាប់ស្វាយចន្ទីកម្ពុជា សម្រាប់នាំចេញទៅទីផ្សារកូរ៉េ និងទីផ្សារសក្តានុពលក្នុងតំបន់ដទៃទៀត។
បន្ទាប់ពីជំនួបក្រោមការសម្របសម្រួល ដោយសហព័ន្ធស្វាយចន្ទីកម្ពុជា គណៈប្រតិភូនៃទីភ្នាក់ងារថាមពលកូរ៉េ (The Korea Energy Agency) នឹងបន្តដំណើរទស្សនកិច្ចចុះសិក្សាផ្ទាល់ នៅចំការស្វាយចន្ទីដែលស្ថិតនៅក្នុងខេត្តកំពង់ធំ៕
