ដោយ៖ វុធ្ធី
អន្តរជាតិ៖ ប្រទេសចិន នឹងបង្កើនកិច្ចខិតខំប្រឹងប្រែង ដើម្បីពង្រីកបណ្តាញតំបន់ពាណិជ្ជកម្មសេរីនៅជុំវិញពិភពលោក ក្នុងការពង្រីក “ចំណងមិត្តភាព” របស់ខ្លួន។ នេះបើយោងតាមលោក Zhong Shan រដ្ឋមន្រ្តីក្រសួងពាណិជ្ជកម្មចិន។
លោក Zhong បាននិយាយថា បន្ទាប់ពីចុះហត្ថលេខាលើភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ប្រទេសចិន នឹងមើលឃើញថា កិច្ចព្រមព្រៀងពាណិជ្ជកម្មសេរីចិន-កម្ពុជា មានប្រសិទ្ធិភាព តាំងពីដំបូង និងពន្លឿនកិច្ចចរចាកិច្ចព្រមព្រៀងវិនិយោគជាមួយសហភាពអឺរ៉ុប។
លោក ក៏បានជំរុញឱ្យមានកិច្ចខិតខំប្រឹងប្រែង ដើម្បីធ្វើឱ្យប្រសើរឡើងនូវកិច្ចព្រមព្រៀងពាណិជ្ជកម្មដែលមានស្រាប់ជាមួយអាស៊ាន សិង្ហបុរី កូរ៉េខាងត្បូង នូវែលហ្សេឡង់ និងសម្រួលដល់ចិន-កូរ៉េ ក្រុមប្រឹក្សាសហប្រតិបត្តិការឈូងសមុទ្រ និងការការចរចាកិច្ចព្រមព្រៀងពាណិជ្ជកម្មសេរីចិន-ន័រវែស និងចិន-អ៊ីស្រាអែល។
លោកបន្តថា កិច្ចព្រមព្រៀង RCEP ឈានដល់កម្រិតខ្ពស់នៅក្នុងវិស័យសំខាន់ៗ រួមមាននីតិវិធីគយ និងការសម្របសម្រួលពាណិជ្ជកម្ម ការការពារកម្មសិទ្ធិបញ្ញា ពាណិជ្ជកម្មអេឡិចត្រូនិក និងដំណោះស្រាយពាណិជ្ជកម្ម។ ប្រទេសចិន នឹងចូលរួមយ៉ាងសកម្មក្នុងការសន្ទនា និងការប្រាស្រ័យទាក់ទងជាមួយសេដ្ឋកិច្ចធំៗ និងយន្តការពាណិជ្ជកម្មក្នុងតំបន់។
លោក Bai Ming អ្នកស្រាវជ្រាវមកពីវិទ្យាស្ថានស្រាវជ្រាវ និងទំនាក់ទំនងរបស់ចិន បាននិយាយថា ការចុះហត្ថលេខាលើ RCEP នឹងជួយប្រទេសចិន បង្កើនប្រសិទ្ធភាពនៃការធ្វើពាណិជ្ជកម្ម និងការវិនិយោគទុនបរទេស តាមរយៈការបើកឱ្យកាន់តែទូលំទូលាយ និងស៊ីជម្រៅ និងកាន់តែមានភាពចម្រុះថែមទៀត ដោយបន្តរួមបញ្ចូលជាមួយច្បាប់ពាណិជ្ជកម្ម និងវិនិយោគអន្តរជាតិ ក្នុងកម្រិតខ្ពស់ និងកសាងសេដ្ឋកិច្ចបើកចំហនៅកម្រិតខ្ពស់។
RCEP ដែលជាកិច្ចព្រមព្រៀងពាណិជ្ជកម្មសេរីធំជាងគេបំផុតនៅលើពិភពលោក ត្រូវបានចុះហត្ថលេខានៅពាក់កណ្តាលខែវិច្ឆិកា ដោយប្រទេសជាសមាជិកអាស៊ានចំនួន១០ រួមមានចិន ជប៉ុន កូរ៉េខាងត្បូង សាធារណរដ្ឋកូរ៉េ និងនូវែលសេឡង់។
ដោយគ្របដណ្តប់លើទីផ្សារចំនួន ២,២៧ពាន់លាននាក់ និងផលិតផលក្នុងស្រុកសរុប ដែលមានចំនួន ២៦,២ ពាន់ពាន់លានដុល្លារសហរដ្ឋអាមេរិក ប្រទេសហត្ថលេខី RCEP ដែលបានចំណែកប្រមាណ ១ភាគ៣ នៃសេដ្ឋកិច្ចពិភពលោក នឹងក្លាយជាទីផ្សាររួមដ៏ធំមួយ៕
