ដោយៈ ម៉ាលីនណា
ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា បានចុះអនុស្សរណៈយោគយល់គ្នា ជាមួយក្រសួងបច្ចេកវិទ្យា និងទូរគមនាគមន៍ឡាវស្តីពី កិច្ចសហប្រតិបត្តិការលើស័យបច្ចេកវិទ្យា និងនវានុវត្តន៍។
គោលដៅនៃMOUនេះ ធ្វើឡើងដើម្បីលើកកម្ពស់កិច្ចសហប្រតិបត្តិការ និងផ្លាស់ប្តូរបទពិសោធន៍គ្នាទៅវិញទៅមក ឱ្យកាន់តែប្រសើរឡើងលើវិស័យបច្ចេកវិទ្យា។
ក្នុងពិធីចុះអនុស្សរណៈយោគយល់គ្នានេះ ត្រូវបានធ្វើឡើងកាលពីថ្ងៃទី ២៣ ខែមីនា ឆ្នាំ ២០២៣ ក្នុងអំឡុងពេលដែលលោក Boviengkham VONGDARA រដ្ឋមន្ត្រីក្រសួងបច្ចេកវិទ្យា និងទូរគមនាគមន៍ឡាវ បានដឹកនាំគណៈប្រតិភូទស្សនកិច្ចនៅកម្ពុជា។
ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍លោក ចម ប្រសិទ្ធ មានប្រសាសន៍ថា ទោះបីមានការរំខាន ដោយបញ្ហារោគរាតត្បាតកូវីដ១៩ក៏ដោយ ក៏ប្រទេសយើងទាំងពីរអាចសម្រេចបាន នូវអនុស្សរណ:យោគយល់គ្នានេះ ដែលជាមូលដ្ឋានគ្រឹះមួយ ក្នុងការជំរុញលើកកម្ពស់នូវ ទំនាក់ទំនងនិងកិច្ចសហប្រតិបត្តិការ និងផ្លាស់ប្តូរបទពិសោធន៍គ្នា ទៅវិញទៅមកឱ្យកាន់តែប្រសើរឡើងលើវិស័យ បច្ចេកវិទ្យា និងនវានុវត្តន៍ តាមការដាក់ចេញនូវផែនការសកម្មភាពរបស់ប្រមុខថ្នាក់ដឹកនាំនៃប្រទេសទាំងពីរ។
ជាមួយគ្នានេះ លោកបានចាត់ទុកដំណើរទស្សនកិច្ច និងការបំពេញបេសកកម្មការងារ របស់គណ:ប្រតិភូឡាវនៅកម្ពុជា គឺជាការអនុវត្តដំបូងគេនូវកិច្ចព្រមព្រៀង ដែលបានធ្វើឡើងរវាងប្រទេសទាំងពីរ ក្នុងអំឡុងពេលនៃដំណើរទស្សនកិច្ច របស់លោកនាយករដ្ឋមន្ត្រី ហ៊ុន សែន កាលពីខែកុម្ភ:កន្លងទៅ ក្នុងភាពជាដៃគូកិច្ចហប្រតិបត្តិការគ្រប់ជ្រុងជ្រោយ។
ជាមួយគ្នានេះដែរ លោក ចម ប្រសិទ្ធ បានសម្ដែងការស្វាគមន៍ចំពោះគណៈប្រតិភូឡាវ ដែលដឹកនាំដោយលោក Boviengkham VONGDARA រដ្ឋមន្ត្រីក្រសួងបច្ចេកវិទ្យា និងទូរគមនាគមន៍ឡាវ ស្របពេលដែលកម្ពុជានឹងរៀបចំទិវាជាតិ វិទ្យាសាស្ត្រ បច្ចេកវិទ្យា និងនវានុវត្តន៍ និងការតាំងពិព័រណ៍ វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា-អន្តរជាតិលើកទី១ឆ្នាំ២០២៣ របស់ខ្លួន ហើយប្រទេសឡាវក៏មានស្តង់ពិព័រណ៍ចូលរួមផងដែរ៕
