ដោយៈ គង់ ម៉ាលីនណា
អាមេរិកៈ ភាគហ៊ុនរបស់ក្រុមហ៊ុនលំដាប់យក្សNetflix បានដាំក្បាលចុះគួរឲ្យបានរម្ភ បន្ទាប់ពីបានប្រកាសរបាយការណ៍ធ្លាក់ចុះប្រាក់ចំណូលនិងអតិថិជន ក្នុងត្រីមាសទី១ ឆ្នាំ២០២២ របស់ខ្លួន។
ក្រុមហ៊ុនផ្តល់សេវាកម្ម Streaming ផ្នែកកំសាន្តដ៏ល្បី Netflix កាន់តែជួបបញ្ហាធំ គឺបានខាតបង់ប្រាក់រហូតដល់៥៤ពាន់លានដុល្លារក្នុងមួយថ្ងៃ នៅលើទីផ្សារភាគហ៊ុន ដោយសារអ្នកវិនិយោគ និងម្ចាស់ភាគហ៊ុន សម្រេចលក់ហ៊ុនរបស់ខ្លួនចេញក្នុងតម្លៃទាប ជុំវិញការ ព្រួយបារម្ភ។ នេះបើតាមការចេញផ្សាយដោយសារព័ត៌មាន Yahoo នៅថ្ងៃទី២២ ខែមេសេា ឆ្នាំ២០២២។
Netflix នៅថ្ងៃពុធសប្តាហ៍នេះ បានប្រកាសពីបាត់បង់អតិថិជន (Subscribers) ជាលើកដំបូងក្នុងរយៈពេលជាងមួយទសវត្សរ៍មកនេះ ដែលបញ្ហានេះបានធ្វើឲ្យអ្នកវិនិយោគ និងម្ចាស់ភាគហ៊ុនលក់ក្នុងអត្រាប្រកាសអាសន្ន។
គ្រាន់តែព៌តមានពីការធ្លាក់ចុះចំនួនអ្នកគាំទ្រ ត្រូវបានប្រកាស ក្នុងរយៈពេលតែមួយថ្ងៃប៉ុណ្ណោះ តម្លៃភាគហ៊ុនរបស់ក្រុមហ៊ុន Netflix បានធ្លាក់ចុះយ៉ាងគំហុកដល់ទៅ៣៥% ដែលជាការដួលរលំដ៏ធំបំផុត សម្រាប់ក្រុមហ៊ុនចាប់តាំងពីឆ្នាំ២០០៤ និងការខាតបង់ដ៏ធំបំផុតក្នុងរយៈពេលត្រឹមមួយថ្ងៃ នៅក្នុងប្រវត្តិសាស្រ្តផ្សារហ៊ុន ដែលអាចស្មើនឹងទឹកប្រាក់៥៤ពាន់លានដុល្លារ។
ជុំវិញបញ្ហានេះ នាយកប្រតិបត្តិក្រុមហ៊ុន Netflix បាននិយាយថា “ខ្ញុំដឹងថាវាជា រឿងខកចិត្តសម្រាប់អ្នកវិនិយោគ ហើយវាគឺជាការពិត។ ប៉ុន្តែផ្ទៃក្នុងយើងពិតជាត្រៀមលក្ខណៈរួចរាល់អស់ហើយ ដើម្បីធ្វើយ៉ាងណាឲ្យវាប្រសើរឡើងវិញ”។ លោកបន្តថា “នេះគឺជាពេលដ៏សំខាន់ហើយយើងផ្តោតខ្លាំងលើការសម្រេចបាននូវគោលបំណងទាំងនោះ ព្រមទាំងនឹងត្រឡប់ទៅរកក្ដីសង្ឃឹមរបស់អ្នកវិនិយោគរបស់យើងវិញ”។
ឆ្លើយតបនឹងការខាតបង់ដ៏សម្បើមនេះ បច្ចុប្បន្ន Netflix កំពុងពិចារណាបញ្ឈប់មនុស្ស ពីការចែករំលែកពាក្យសម្ងាត់ សម្រាប់គណនីដូចគ្នា ដោយរក្សាគណនីដែលបានចុះឈ្មោះនីមួយៗ អាចប្រើបានតែមួយគណនីប៉ុណ្ណោះ៕
