ដោយៈគង់ សូរិយា
ព្រះសីហនុៈ អភិបាលនៃគណៈអភិបាលខេត្តព្រះសីហនុ បានចុះពិនិត្យដោះស្រាយបញ្ហាប្រឡាយ និងស្ពានសំខាន់ៗដើម្បីទប់ស្កាត់ការជន់លិចនៅក្នុងទឹកដីក្រុងព្រះសីហនុ។
សកម្មភាពចុះពិនិត្យប្រព័ន្ធលូ អូរប្រឡាយ និងស្ពានសំខាន់ៗចំនួន៥ទីតាំង ស្ថិតក្នុងភូមិសាស្ត្រសង្កាត់លេខ៤ ក្រុងព្រះសីហនុរួមមានដូចជា៖
-អូរប្រឡាយអូរពីរ នៅមុខសាលាក្រុងព្រះសីហនុ
-ការដ្ឋានស្ពានលូអូរមួយ
-អូរប្រឡាយ និងស្ពាន L.V
-អូរប្រឡាយ និងស្ពានអង្គការម្លប់តាប៉ាង
-អូរប្រឡាយ និងស្ពានអូរស្តេចមឹក។
លោកអភិបាលខេត្ត បានមានប្រសាសន៍ថា ទីតាំងខាងលើ គឺតែងរងនូវបញ្ហាប្រឈម ដោយការជន់លិចនៅរដូវ វស្សានាពេលកន្លងមក។ ដូច្នេះហើយទើបរដ្ឋបាលខេត្ត បានប្រើប្រាស់កញ្ចប់ថវិកាជាតិឆ្នាំ២០២១ ដើម្បីរៀបចំស្ថាបនា និងស្តារទីតាំងទាំងនោះ ឱ្យបានធំទូលាយទៅតាមនិយាមកា ដើម្បីឱ្យលំហូរទឹកបានលឿន កាត់បន្ថយការជន់លិចរយៈពេលវែងនៅពេលមានភ្លៀងធំម្តងៗ។
លោកគួច ចំរើន បានជម្រុញដល់ក្រុមការងារ ត្រូវពន្លឿនការងារស្ថាបនាការដ្ឋានសាងសង់ ឱ្យបានលឿនមុនពេលរដូវវស្សាចូលមកដល់ និងបានណែនាំមន្ត្រីជំនាញ ធ្វើការបំពាក់អំពូលភ្លើងសាធារណៈ នៅតាមស្ពាន និងផ្លូវប្របអូរប្រឡាយ ដើម្បីផ្តល់ភាពងាយស្រួលដល់ប្រជាពលរដ្ឋ ធ្វើដំណើរនៅពេលយប់ផងដែរ៕
